Wararka ka imaanaya wadanka Faransiiska ee dhaca qaaradda Yurub ayaa sheegaya in dibad baxyo rabshado wata ay markale dib uga qarxeen magaalooyinka waaweyn ee wadankaasi.

dibad baxyada oo galay isbuucii 13-aad waxaa dhigaya dadka katirsan dhaq dhaqaaqa jaakadaha jaallaha kuwaas oo qaab bulsho ugu kacdoomay madaxweynaha faransiiska ninka lagu magacaabo Makron.

Tobanaan kun dibax baxayaal ah ayaa maalintii sabtiga isugusoo baxay magaalooyinka waaweyn ee wadanka sida Paris iyo Niis waxaana jiray isku dhacyo u dhaxeeyay ciidamada booliska iyo dadka dibad baxyada ka qeyb qaadanaya.

dibad baxyadan ayaa yimid saacado kadib markii golaha wasiirrada dowladda faransiiska ay meel mariyeen qaraar ciidamada ammaanka u ogolaanaya in ay adeegsadaan ulaha iyo ubadadka si ay dibad baxayaasha u kala eryaan.

Dibad baxayaasha faransiiska ayaa iskusoo baxyadii shalay ugu magac daray "socodka weyn ee loogu gargaarayo dhaawacyada', hoggaamiyaasha dhaq dhaqaaqa jaakadaha jaallaha ayaa ku eedeeyay xukuumadda Paris in awood xad dhaaf ah ay u adeegsanayso daminta dibad baxyada waxayna baraha bulshada ku faafiyeen qoraallo ay dadka uga dalbanayaan dibad baxyo milyuuni ah.

Ururka midowga Yurub oo xubnaha ugu muhiimsan uu kamid yahay faransiiska ayaa war uu soo saaray ku sheegay inuu ka xunyahay kacdoonnada faransiiska kajira, shacabka nasaarada faransiiska ayaa ka sheeganaya hoos udhac dhaqaale iyo sicirka shidaalka oo dowladdu sare uqaaday waxaana usii dheer shaqa la'aan baahsan.