Warbixin cusub oo ay soo saartay hay'ad Mareykanka ah ayaa lagu sheegay in Xasan Gurguurte hoggaamiyaha DF-ka ee Soomaaliya uusan maamulin wadanka islamarkaana ciidamada shisheeyaha AMISOM ay qaati ka taaganyihiin dagaalka ay kula jiraan shabaabul Mujaahidiin.

Madaxa Hay’adda Brookings Institution oo warbaahinta kula hadashay magaalada Washington ayaa ka warbixisay socdaalka ay bishii March,2015 ku tagtay magaalada Muqdisho halkaasi oo ay kulasoo kulantay mas’uuliyiin katirsan DF-ka iyo saraakiisha ciidamada gumeysiga AMISOM.

Vanda Felbab Brown waxay sheegtay in Soomaaliya ay kajirto dowlad tabar daran oo jiritaankeeda ay halis ku yihiin musuq maasuq iyo xarakada Shabaabul Mujaahidiin.

Waxay sheegtay in ciidamada ammaanka ay ka amar qaataan siyaasiyiin,shirkado shisheeye iyo qabaa’illo soomaaliyeed islamarkaana aysan jirin wax awood maamul ah oo gacanta ugu jira xasan Sheekh.

"Ciidanka ammaanka soomaaliya wuxuu gacanta ugu jiraa siyaasiyiin,ganacsato iyo qabaa’illo majiro ciidan taya leh oo madaxweyne Xasan Sheekh gacanta ku hayo”ayay tiri Vanda Felbab Brown.

Hay’adda Brookings Institution waxay soo hadal qaadday kaalinta ciidamada shisheeyaha AMISOM ku leeyihiin maamulidda soomaaliya,”Ciidamada AMISOM kama amar qaataan xukuumadda mana ah kuwa nidaamsan kaliya waxay ku egyihiin saldhigyadooda”ayaa lagu yiri warka kasoo baxay hay’adda Mareykanka ah.

Sidoo kale Brookings Institution waxay warbixinteeda ku sheegtay in ciidamada AMISOM ay ka caga jiidayaan dagaalka ay kula jiraan xarakada shabaabul Mujaahidiin.

Ciidamada shisheeyaha waxay si gaabis ah u wadaan howlgallada ka dhanka ah Al Shabaab marmarka qaarna islaamiyiintu waxay dib uqabsadaan deegaanada AMISOM kasoo baxaan.

"AMISOM way ka gaabisay ladagaalanka Al Shabaab magaalooyinka qaar maalintii ayay AMISOM joogtaa xilliga habeenkii ah waxaa maamula Al Shabaab”ayay hadalkeeda sii raacisay Vanda Felbab Brown.

Ugu dambeyntii hay’adda Mareykanka ah waxay sheegtay in musuq maasuq daran oo daashaday dhammaan hay’adaha xukuumadda iyadoo tusaale usoo qaadatay in askariga katirsan DF-ka uusan qaadan mushaar joogta ah taasi oo keentay in ay hantida shacabka boobaan.

Muraad Jaamac,Dubai,UAE
[email protected]