Dowlada Turkiga ayaa ku dhawaaqday in ay tababar usoo xirtay dufcaddii ugu horraysay oo ah ciidamo ay leedahay dowladda Federaalka Soomaaliya.

Munaasabad shalay ka dhacday saldhigga melleteriga Turkiga ee magaalada Muqdisho waxaa ka qeyb galay Max’med Cabdullaahi Farmaajo madaxweynaha dowladda Federaalka.

Farmaajo ayaa walaac ka muujiyay in ciidamadan ay maraan halkii ay mareen kumanaan ka horreeyay oo tababarro ku qaatay gudaha dalka iyo dibadda kadin lawaayay halka ay mareen.

Wuxuu sheegay in ciidamada tababarka qaatay looga baahanyahay in ay meel iska dhigaan dhaqanka qabyadda ee ladegay madaxa DF-ka askari illaa iyo madax.


"Askari xun ma jiro, laakiin waxaa jira sarkaal xun, maxaa yeelay ficilka askariga waa ficilka madaxdiisa, waxaa loo baahan yahay waajibaadkeena in aan gudano" ayuu yiri Farmaajo.

Hoggaamiyaha DF-ka ayaa ka digay in ciidamada Tababarka ku qaatay saldhigga Turkiga ay dib ugu laabtaan qaabkii maleeshiyaadka ayna hoosta ka galaan saraakiisha beelahooda.

"Hadii qaabkii hore aan ku jirnay iyo duruufihii adkeyd aan u fikireynay oo ah qaababka guracan ee qabyaalada ama beelo, waa in aan u fakirno qaab qaran” ayuu hadalkiisa sii raaciyay Farmaajo.

Hoggaamiyaha DF-ka ayaa horay ugu cataabay in ciidamada dowladdiisu aysan laheyn caqiiddo Janno gelinaysa oo ay u dhintaan halka ciidamada Shabaabul Mujaahidiin ay leeyihiin Caqiiddo jannada gelinaysa oo ku riixaysa in ay udagaallamaan oo loo dilo.