12-ka bisha August ee nagu soo wajahan waxay noqonaysaa lix sano ka dib markii saddex diyaaradood oo ay leeyihiin ciidamada military-ga Uganda ay ku burbureen wadanka Kenya iyagoo kusoo wajahan Soomaaliya, ayna halkaas ku dhinteen ugu yaraan 7 askari oo ka tirsan ciidamada UPDF-ta Uganda.

Saraakiishii ciidamada cirka ee uu madaxweynaha dalkaas Yuweri Museveni shilkaas dartii u ceyriyey ayaa hadda dib loogu soo celiyey Soomaaliya iyagoo haya xilal ka sarreeya kuwii hore ee laga xayuubiyey.

Gen Jim Owoyesigire oo shilkaas dartii u waayey xilkiisii ahaa taliyaha ciidamada cirka Uganda, hadda waa abaanduulaha guud ee dhamaan ciidamada AMISOM ee ku sugan Soomaaliya, waxaana hoosyimaada ciidamada Dowladaha shanta ah ee ku mideysan isbaheysiga saliibiga ee iskumagacaabay Midowga Afrika.

Brig Moses Rwakitarate oo ahaa madixii shaqaalaha ee ciidamada Cirka oo isagu xilligaas waayey xilkiisa waxaa hadda loo magacaabay la taliyaha Uganda ee midowga Yurub.

Laakiin ciidamada Uganda ee ku sugan Soomaaliya waxay howlgalayaan iyagoo ku jira xaalad adag oo aan heysan wax diyaarado ah, dhaawacyadooda si deg deg ah loogama soo qaadi karo furimaha dagaalka, dabagalna kuma sameyn karaan dagaalyahada Al-Shabaab ee soo weeraraya saldhigyadooda.

Afhayeenka ciidamada Uganda Richard Kamemire oo u waramay wargeyska Daily Monitor ayaa sheegay in weli QM ay ku cadaadinayaan sidii ay u keeni laheyd diyaaradihii burburay badalkooda ama dhaqaalihii ku baxay "weli waan ku cadaadineynaa sidii ay u heli lahayn magdhowgaas” ayuu yiri.

QM ayaa taageero dhanka loojistikada ah iyo kaalma dhaqaale siisa dhamaan dowladaha Afrikaanta ee ay ciidamada ka joogaan Soomaaliya.

Dowladda Uganda waxay muddo sanado ah raadineysay in ay hesho magdhowga diyaaradahan oo qiimahooda lagu qiyaasay 10 milyan oo dollar.

Dowladda Uganda ayaa diyaaradahan oo ahaa kuwa saddex ah u soo dirtay Soomaaliya bishii August ee sanadkii 2011-kii si ay ugu xoojiyaan duullaan ballaaran oo xilligaas ay ku soo qaadeen wilaayada Sh/hoose.

Wargeyska qoray warbixintan wuxuu leeyahay xilliga diyaaradahan loo dalbayey ciidamada Uganda waxay difaacooda ugu dambeeyey Yaallay degmada Afgooye e balse hadda ayey taagan tahay baahida dhabta ah ee ay u qabaan diyaarado maadama ay isku fidiyeen dhul ballaaran oo ay adag tahay in safar dhulka ah lagu gaarsiiyo saheyda.

Muddo lix sanadood ah ayaa hadda laga joogo shilkaas oo Uganda ay ku weysay saddex diyaaradood iyo todobo askari, QM-na waxay ku adkeysatay in aysan awoodin bixinta magdhowga diyaaradahaas oo ah 10 milyan oo dollar laakiin Uganda ayaa weli ku calaacaleysa mudanayaashooda reergalbeedka si ay u helaan dhaqaalaha ay raadinayaan.